في استراحة العناية المركزة

في استراحة العناية المركزة.........

استراحة العناية المركزة هي مكان من اعجب ما يكون, بشر متجمعة من كل الالوان و الطبقات و الخلفيات الثقافية و الدينية

السلفي قاعد جنب القسيس و المنقبة جنب المسلمة اللي لابسة مكشوف و مش محجبة, البدوي جنب الباشا اللواء, دكتورة الجامعة جنب ربة البيت اللي يدوبك بتفك الخط.

ام مجروحة على ابنها و عيال مجروحين على ابوهم

ست بتعيط على جوزها و راجل بيخانق البلاط عشان عايز مراته تطلع

خلطة عجيبة جدا من البشر ميعرفوش بعض كلهم منتظرين خبر عن الحالات بتاعتهم, ناس ملهاش اي علاقة ببعض ولا حتى في الاحلام لكن كلهم حاسين بنفس التوتر و القلق و الامل و الحزن, خوف لكل المجهود ده يضيع على الارض و قلق من فواتير المستشفى اللي مش بترحم

امل ان حالتهم تقوم بالسلامة و ترجع زي ما كانت و يمكن احسن, و توتر كبير جدا كل ما ممرضة او دكتور يطلعوا يندهوا باسم حالة من الحالات

الكل مش بيقول غير كلمة واحدة يارب اشفيهم و ان شاء الله هيكونوا بخير.

الكل بيواسي بعضه و بيسأل ايه الاخبار و ازي حالتكم, و الدكاترة بتقول ايه و التحاليل و الاشعات......الخ

و بيساعوا بعضهم و يوسعوا لبعض في الاماكن , و اللي تعيط الكل يطبطب عليها

السؤال اللي بيتبادر للذهن, ما احنا عرفنا نساع بعض هنا, ليه مش عارفين نتحمل بعض بره؟
هي الخناقة على ايه اساسا؟
بنحاول نثبت ايه؟ مش فاهمة؟

و الله ما تستاهل, احنا كلنا نعرف نعيش كويس سوى لو ببساطة كل واحد خلاه في حاله , وكل اللي اهتم بيه بالنسبة للناس التانية انه يكون انسان

انسان و بس

يارب اشف كل مريض , و ريح قلوب كل القلقانين😥😥😥😥😥😥