وهل الشتاء
ذلك الفصل الغريب المليء بالبرودة, و كثير من القسوة .....................
وبالاخص على بشرتنا الجافة
في الفترة دي اغلبنا بيعانوا من جفاف البشرة و على رأسهم صاحبات البشرة الجافة, وبيزيد التشقق و الاحساس بإن البشرة مشدودة جدا, احيانا بيزيد الموضوع لحد الجروح في الايد و الرجل و احيانا الوش
طيب نعتني ببشرتنا في الشتا ازاي؟
النهاردة هنتكلم عن شوية نقط للعناية بالوش تحديدا:
1- نوع الصابون: اختاري صابون مرطب. بلاش انواع الصابون العادي "و نخص بالذكر الرخيص منها - بمناسبة الغلاء اللي احنا فيه" حاولي تغسلي وشك الصبح بصابون مرطب من نوع نضيف
2- غسول مرطب: ممكن تستبدلي الصابون بنوع غسول مرطب مضمون , يحمي بشرتك و ينقيها
3- المبالغة في التنضيف: في بنات عندها حالة من الوسوسة "بالمفهوم الدارج : الهسهس" تنزل الشارع تجيب كيس مناديل و ترجع تغسل وشها تدخل المطبخ خمس ثواني تغسل وشها.......الخ
الحقيقة ان البروتوكول ده لا يصلح نهائيا في الشتا و خاصة مع البشرة الجافة, لأنه بيزود جدا من حالة الجفاف و الشدة اللي بتبقى عليها البشرة, المعقول حلو. خير الامور الوسط
4- شرب المياه: و ده مش بس مهم للبشرة , لأ ده مهم لكل عضو من اعضاء الجسم, واحنا في الشتا عادة بناكل اكتر من ما بنشرب و بالتالي بشرتنا بتضر و وزننا بيزيد, مهم جدا شرب كمية موفورة من الماء لا تقل عن 8 كوبايات في اليوم , وطبعا لازم تكون مياه نقية والا هيبقى ضررها اكتر من فايدتها
5- كريم مرطب بالنهار: مع زيادة الجفاف لازم يزيد استخدامك للكريمات المرطبة الموثوقة, عشان تحسني من احساسك و ثقتك بنفسك, وعشان تحافظي على نضارة بشرتك و تقللي من تأثير التجاعيد و الشيخوخة المبكرة على بشرتك
6- تقشير البشرة: و دي تكنيك مهم في الشتاء, كل اسبوع محتاجة تعملي تدليك لبشرتك لإزالة الجلد الميت و اعطاء فرصة لجلد اكتر نضارة انه ينمو و يتنفس, ممكن تنفذي التكنيك ده بمواد طبيعية زي ماسك الردة و ماية الورد , او الزبادي و الشوفان
او انك تستخدمي كريمات تقشير موثوقة جدا, و من نوع نضيف لحماية بشرتك
7- تناول الفواكه و الخضر: للأسف بنات و شباب كتير جدا بيهملوا اكل الخضار و الفواكه, مع انها من اهم العوامل اللي بتحسن الصحة عموما, وطبعا بتحسن من الصحة البشرة و بتخليها اكتر نضارة, فاكهة الشتاء زي البرتقال و الجوافة ممتازة جدا لعموم الصحة و بالاخص صحة الجلد لإحتواءها بكميات وافرة على فيتامين سي, متنسوش الاكثار منها , ضرورية جدا.
8- ترطيب الشفايف: الجزء ده هو الاكثر عرضه للتشقق و الجفاف و التعرض للإصابة في الشتا, من الضروري جدا وضع مرطبات وبلسم من نوع وثوق للشفايف, حماية و تغطية و حفاظ على المرونة.
9- ماسكات ترطيب البشرة: من التقنيات القديمة جدا لكنها مهمة جدا, بتعملي ماسك ترطيب و تغذية لبشرتك مرة في الاسبوع على الاقل, الماسك ده ممكن يكون طبيعي زي ماسك العسل بالزبادي او زيت الزيتون مع صفار البيض و ممكن يكون باستخدام ماسكات جاهزة من ماركات موثوقة , بتطبق الماسك الطبيعي لمدة 15 دقيقة و بعدين تغسليه بصابون مرطب و مياه دافية, او لو ماسك مصنع بتتبعي القواعد المكتوبة على المنتج بشكل سليم.
10 - الابتعاد عن العادات الضارة: زي التدخين , السهر المبالغ فيه, الوجبات الخفيفة و السريعة زي الشيبسي و الشيتوس, مضار الاشياء دي اكتر كتيييييييييييييييييييييييييييييييييييييييييييييييييييييييييييير من نفعها
تابعونا في مقالات تانية و هنتكلم اكتر عن العناية بباقي الجسم
نهاركم بيضحك
الادمن
